Vaalbos Nasionale Park

Waar is hierdie park? Die afdraai na hierdie nasionale park is 19 km vanaf Barkly-Wes op die R 31 na Kuruman. Draai regs by die “Longlands” afdraai. ‘n Kenmerkende bruinbord met die woorde “Vaalbos National Park” is ietwat versteek so ‘n klompie meters voor die afdraai. Volg die gruispad, wat redelik sinkplaat gery is, vanweë die delwerye, vir sowat 5 km, kruis die Vaalrivier oor die brug, wat jou nie aan ‘n paaie departement se werk herinner nie, nietemin dit help jou om die rivier te kruis, draai links en jy word ingewag deur ‘n baie vriendelike beampte van die parkeraad by die hek.

Die park van 23 000 hektaar is in September 1986 geproklameer en bestaan hoofsaaklik uit savanna grasvelde met kameeldoringbome, doringbosse en vaalbosse vanwaar dan ook die naam van die park. Hierdie gebied is ook deel van die area waar diamante vroeg in die 20ste eeu ontdek is en daar is nog steeds tekens van ongerehabiliteerde delwerye in die park. Die landskap wissel van rooi / geel sand, klipperig op die hoër gebiede tot ‘n kleigrond nader aan die rivier. Dit is somerreën gebied met ‘n gemiddelde reënval van ongeveer 400 mm per jaar. Temperature van so hoog as 44º C in die somer en koue winters met ‘n daling in die kwik tot -4º C is normaal.

En die jaar was goed...

Akkommodasie: Ten volle toegeruste selfsorg chalets wat slaapplek bied aan vier persone en daagliks gediens word deur parkeraad personeel is beskikbaar, bring net jou eie ete en te drinke. Van die drie chalets is een toeganklik vir gestremdes. Hier is ons in die natuur met geen omheining.

Die park bied ook geleentheid vir dagbesoekers om in die koelte van kameel, haak-en-steek doringbome op die walle van die Vaal te ontspan.

Ongeveer 17 km van die hek is daar ‘n kampterrein met 11 staanplekke tussen en onder doringbome wat baie privaatheid bied. Elke staanplek is toegerus met ‘n geboude sement tafel en bankies asook ‘n braai area. Waterkrane is op strategiese plekke tussen staanplekke aangebring. Was en toilet geriewe is beskikbaar met buitelug storte wat almal, wat vir die eerste keer daar kom aan die praat het. Gasverwarmers is beskikbaar vir warm water wat dan met ‘n maatemmer na die “buitestort” geneem word. Vul die sinkemmer met stortkop, katrol die emmer met warm water op en geniet ‘n opelug stort. Daar is twee emmers om lekker “lank” te stort!

Die opelug stort wat almal aan die praat het.

Padnetwerk binne die park: Van die ingangshek is daar ‘n gegruisde pad na die kampterrein, met twee sirkel roetes van onderskeidelik 9 en 12 km aan die weste en oostelike kante van die terrein. Afgesien van hierdie paaie wat toeganklike is vir sedan motors is daar ook ‘n eko-roete van 35 km waarvoor ‘n hoër voertuig benodig word, ‘n viertrekvoertuig is nie nodig nie maar maak die rit net ‘n bietjie gemakliker. Die totale afstand van die eko-roete is ongeveer 55 km wat toeristepad insluit, hierdie roete word strek aanbeveel en moet nie uitgesluit word van ‘n besoek aan die park nie. Diegene wat nie oor ‘n geskikte voertuig beskik nie kan met ontvangs reël vir ‘n besoek met ‘n parkeraad voertuig

Diere in die park:
	Daar is min parke so groot soos Vaalbos, waar buffels, wit en swart renosters, gemsbokke en die skaars bastergemsbok (Roan), blou wildebeeste, rooi hartbees, basterhartbees (Tsessebe), koedoes, kameelperde, elande, zebras, springbokke, duikers en steenbokkies op een dag met ‘n rit in die park gesien word.
Bastergemsbok (Roan)	Dan praat ons nie van die baie vlakvarke met kleintjies en kenmerkende regop stertjie wat met gereelde tussenposes in die gras langs die pad hul verskyning maak nie. Wat opvallend was dat ons met ons besoek nie enige jakkalse gesien het nie maar hul kenmerkende geroep in die nag was nie stil nie, maar sterk hoorbaar naby die kampterrein.	Blou Wildebeeste

Kameelperde		Basterhartbees (Tsessebe)

Swartkorhaan	Pofadder	Buffel
	Video van stoeiende Rooihartbeeste
Volgens inligting beskikbaar by ontvangs is daar nagenoeg 171 verskillende voëlsoorte aangeteken wat hul tuiste in die park gemaak het. Die area is ‘n malaria vrye gebied. Die kampterrein is egter oortrek met duwweltjies so moet nie eens probeer om die skoene by die huis te los nie. Alhoewel die hek in die somer om 19:00 en 18:00 in die winter sluit was dit opvallend hoe baie besoekers laat arriveer, laat jou weereens wonder of die goedgunstigheid van die ontvangs- personeel nie uitgebuit word nie. Met ‘n jaarlikse besoekergetal van net meer dan 3 500 en ‘n hangende grondeis kan besoeke van inwoners van omliggende dorpe soos Barkly-Wes, Kimberley en ander Noord-Kaapse dorpe hul steun op die voortbestaan van Vaalbos afdruk.

Wat kos dit:
Chalets. R 350.00 per dag. (1-4 persone) Addisionele volwassenes R100.00, kinders R50.00,
onder 2 jaar is gratis. Maksimum 6 persone per chalet.

Kampeer: R 75.00 per dag (2 persone).
Addisionele volwassenes R35.00 per persoon en kinders R17.00 per kind.

Eko-roete: R 85.00 in eie voertuig en R65.00 per persoon in park se voertuig.

Dag en oornag besoekers: “Wild Card” inligting beskikbaar by SANParke.