Van Helena is ons met die D3810 tot waar dit aansluit met die D3301 / D3830. Van die aansluiting het ons regs in 'n oostelike ringting gery in die Epukiro omaramba, 'n droë rivierloop, wat plek-plek so toegegroei is dat jy beswaarlik met die twee spoor paadjie kan ry sonder dat  die boom takke jou voertuig krap. Wat ek met ons omsweringe geleer het is om my voertuig 'n goeie "was en politoer diens" te gee voordat ons vertrek, dit beskerm die verf in die bos.

Die Epukiro omaramba met sy windverwaaide duine sluit later aan by die rooibok omaramba wat ons tot teen die grensdraad met Botswana gevolg het. Die bees wat ons gekry het was in pragtige kondisie danksy die rosyntjiebosse wat weelderig groei. Die patrolie pad al langs die grens is 'n eentonige twee spoor sandpad. Ons oornag toe ook hier langs die grens. Die volgende dag is ons verder langs die grens op in 'n noordelike rigting tot ons, ons vas ry teen die grensdraad wat die Gamblok afbaken. Van die hoek is ons in 'n westelike rigting vir 30 km, al langs die grens van die Gamblok tot by Gamhek. By hierdie hek moes ons 'n register voltooi voordat ons die Gamblok mag binnegaan. By die dorpie Gam kry ons  'n polisiestasie, 'n Algemene handelshuis, 'n klompie Hererovrouens in tradisionele drag en kinders wat in die pad / straat bal speel.

Van Gam is daar weer 'n geskraapte pad die C44 na Tsumkwe.  Ons wou die Nya Nya panne besoek en verdwaal omdat ons gereken het die mees gebruikte pad is die toeriste pad, dit was toe nie die geval nie en ons maak toe 'n ontdekking dat daar geboor word vir water toe ons by drie boormasjiene kom. By Tsumkwe oornag ons in die kampeerterein van die Tsumkwe Lodge van Arno en Estelle Oosthuizen. (Tsumkwe is ook die tuisdorp van die akteur in Jame Uys se rolprent "The Gods Must Be Crazy", met ons terugkeer in Suid Afrika lees ons in die Volksblad dat hy oorlede is net na ons daar was.)

Van Tsumkwe is met die tweespoor sandpad na Sikerettikamp, die mees suidelike kamp in die Khaudom. Op hierdie pad, D3303, doen ons eers aan by Dorslandboom, voordat ons meegedeel word deur die kampopsigter dat een van die drie hutte wat ons bespreek het, alreeds in 2000 deur 'n olifant beskadig is.  Omdat ons ingerig is om enige plek te kamp was dit nie vir ons 'n probleem nie.   Met ons verblyf en gesprekke met ander toeriste in die Khaudom, wil dit voorkom asof die drie hutte oor en oor bespreek word, ons kon vir 'n paartjie van Gauteng help met slaapplek agter in een van ons voertuie.

Van ons basis by Sikeretti het ons rond beweeg na Tsoanafontein, Soncana en Omaramba watergate. Ons is verder noord na Khaudum kamp en het aangedoen by Dussi, Tari Kora, Leeupan en Doringstraat watergate. Die Khaudom is bekend vir sy sand twee spoor paadjies wat kronkel deur die bosveldwoud van hardekool, kiaat, wildesering, valsmaroelas en baie olifante. By Khaudum kamp was ons meer gelukkig met die hutte wat ons bespreek het. Van Khaudum kamp is ons terug na Sikeretti, doen ook by die Biackiala watergat aan waar ons baie teleur gesteld was omdat ons niks gekry het nie. By Soncana word ons beloon met 'n trop van in die dertig olifante van 'n verskeidenheid groottes en ouderdomme wat stofbad en hulle dik suip uit die waterkrip. Ons kamp weer by Sikiretti  voordat ons Botswana toe is via die nuwe Dobegrenspos. Hierdie is 'n nuwe pos wat beman word deur die militêrepolisie aan beide kante. Die personeel was baie vriendelik en deeglik, alle vorms en nommers van jou paspoort tot voertuig word behoorlik gekontroleer.